'E PASSERE

Se so' scetate 'e passere, dint' 'ociardino 'nfiore. Comme se fanno a ssentere 'sti passere 'nn'ammore! E, a llengua loro diceno chisà quali pparole, zumpanno e secutannese dinto a na lenza 'e sole. Piie-piie...Piie-piie...Se 'ntrcciano, se mmescano 'sti vvoce ca, mmiezo 'e ceppe d'evera, ll'ammore fa cchiù ddoce. Ma,nun appena sentono 'na porta ca s'arape, 'sti passarielle aizano tutte mparanza 'e ccape… Guardano attuorno...Vedono chi è, ca jesce o trase; po'...ntela e se ne fuieno rimpetto,'ncopp' 'e ccase. E 'n ponta 'o ciglio 'e ll'asteco tu 'e vvide,una filera; e,a ccapofila 'e mascule cu 'a cannacchella nera. Cchiù ttarde,e ddiece,ll'unnice, quanno cchiù 'o sole coce, 'sti passere s'arrocchiano sott'a stu pere 'e noce... Chi vene e va... Chi pizzeca 'na fronna o 'na mullica… Chi,spaso dint''a povere, nun cerca e nun fatica E 'o sole abbafa ll'albere: ll'abbafa e ll'appapagna... E se spatreano 'e passere p''e site cchiù 'e muntagna. Ma,quanno è ll'ora tennera ca 'o sole s'annasconne ah,ch'armunia!che musica! ch'orchestra, mmiezzo 'e fronne! Po,dint' 'a macchia 'e ll'ellera fernesce 'o canto,'e trille, e,azzicco azzicco,dormono 'sti core piccerille. Eduardo Nicolardi

Pagina Precedente

Pagina Principale